ରାୟଗଡ଼ରେ ଉଦ୍‌ଯାପିତ ହେଲା ତିନିଦିନିଆ ଜାତୀୟ କ୍ରୀଡ଼ା ଦିବସ: “ଖେଲେଗା ଭାରତ, ଜିତେଗା ଭାରତ” ବାର୍ତ୍ତାରେ ଉତ୍ସବମୁଖର ଜିଲ୍ଲା​

୩୦/୦୮ (ସାକ୍ଷୀ ଖବର): ଜିଲ୍ଲାପାଳ ଶ୍ରୀ ଆଶୁତୋଷ କୁଲକର୍ଣ୍ଣିଙ୍କ ଆଦେଶକ୍ରମେ ଏବଂ ଅତିରିକ୍ତ ଜିଲ୍ଲାପାଳ ଶ୍ରୀ ରବୀନ୍ଦ୍ର କୁମାର କହଁରଙ୍କ ତତ୍ତ୍ୱାବଧାନରେ ରାୟଗଡ଼ ଜିଲ୍ଲାରେ ଜାତୀୟ କ୍ରୀଡ଼ା ଦିବସ–୨୦୨୬ ଅଗଷ୍ଟ ୨୮, ୨୯ ଓ ୩୦ ତାରିଖରେ ବ୍ୟାପକ ଉତ୍ସାହ ସହିତ ପାଳିତ ହୋଇଯାଇଛି। ଚଳିତ ବର୍ଷର ମୁଖ୍ୟ ବାର୍ତ୍ତା “ଖେଲେଗା ଭାରତ, ଜିତେଗା ଭାରତ” ରଖାଯାଇଥିବା ବେଳେ ଶିଶୁ ଓ ଯୁବପିଢ଼ିଙ୍କୁ କ୍ରୀଡ଼ା ପ୍ରତି ଆକୃଷ୍ଟ କରିବା ଏବଂ ନିୟମିତ କ୍ରୀଡ଼ାକୁ ଜୀବନଶୈଳୀର ଅଂଶ କରିବା ଉପରେ ଗୁରୁତ୍ୱ ଦିଆଯାଇଥିଲା।​ତିନିଦିନିଆ ଏହି କାର୍ଯ୍ୟକ୍ରମର ପ୍ରଥମ ଦିନ ଅର୍ଥାତ୍ ଅଗଷ୍ଟ ୨୮ ତାରିଖରେ “TRIBUTE” ଥିମ୍‌ରେ ଦେଶର ମହାନ କ୍ରୀଡ଼ାବିତ୍‌ଙ୍କ ପ୍ରତି ଡିଜିଟାଲ ଓ ସାମୁଦାୟିକ ଭାବେ ଶ୍ରଦ୍ଧାଞ୍ଜଳି ଅର୍ପଣ କରାଯାଇଥିଲା। ଦ୍ୱିତୀୟ ଦିନ ଅଗଷ୍ଟ ୨୯ ତାରିଖରେ “PLAY” ଥିମ୍‌ ଅଧୀନରେ “ଏକ ଘଣ୍ଟା ଖେଳ ପଡ଼ିଆରେ” ବାର୍ତ୍ତା ସହିତ ଜିଲ୍ଲାର ବିଭିନ୍ନ ବିଦ୍ୟାଳୟରେ କବାଡ଼ି, ଖୋ-ଖୋ, ଫୁଟବଲ୍‌ ଓ ବ୍ୟାଡମିଣ୍ଟନ୍‌ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏହି ଅବସରରେ ଆରକ୍ଷୀ ଅଧୀକ୍ଷକ ଶ୍ରୀ ରାଜ ପ୍ରସାଦଙ୍କ ପକ୍ଷରୁ ସ୍ୱତନ୍ତ୍ର ବ୍ୟାଡମିଣ୍ଟନ୍‌ ପ୍ରତିଯୋଗିତା ମଧ୍ୟ ଆୟୋଜିତ ହୋଇଥିଲା।​ଶେଷ ଦିନ ଅର୍ଥାତ୍ ଅଗଷ୍ଟ ୩୦ ତାରିଖରେ “MOVE” ଥିମ୍‌ ଅନ୍ତର୍ଗତ “Special Sundays – Cycle Edition” କାର୍ଯ୍ୟକ୍ରମ ମାଧ୍ୟମରେ ସାଇକେଲ ଚାଳନା ଓ ଶାରୀରିକ ଗତିବିଧି ପାଇଁ ଜନସାଧାରଣଙ୍କୁ ଉତ୍ସାହିତ କରାଯାଇଥିଲା। ଏହି ସାଇକଲ୍ ରାଲିକୁ ଅତିରିକ୍ତ ଜିଲ୍ଲାପାଳ ଶ୍ରୀ ରବୀନ୍ଦ୍ର କୁମାର କହଁର, ଉପ ଜିଲ୍ଲାପାଳ ଶ୍ରୀ ରମେଶ କୁମାର ଜେନା ଏବଂ ଅତିରିକ୍ତ ଆରକ୍ଷୀ ଅଧୀକ୍ଷକ ମିଳିତ ଭାବେ ଉଦଘାଟନ କରିଥିଲେ।​ଏହି ସମଗ୍ର କାର୍ଯ୍ୟକ୍ରମକୁ ଡେପୁଟି କଲେକ୍ଟର, ଜିଲ୍ଲା କ୍ରୀଡ଼ା ଅଧିକାରୀ, ଜିଲ୍ଲା ଶାରୀରିକ ଶିକ୍ଷା ଅଧିକାରୀ ଏବଂ ଜିଲ୍ଲାର ସମସ୍ତ କ୍ରୀଡ଼ା ଶିକ୍ଷକ ଓ ଶିକ୍ଷୟିତ୍ରୀମାନେ ସଫଳତାର ସହିତ ପରିଚାଳନା କରିଥିଲେ। ଏହି ତିନିଦିନିଆ ଆୟୋଜନ ରାୟଗଡ଼ ଜିଲ୍ଲାରେ କ୍ରୀଡ଼ା ପ୍ରତି ଏକ ନୂତନ ଉତ୍ସାହ ଏବଂ ସକ୍ରିୟ ଜୀବନଶୈଳୀ ପ୍ରତି ବ୍ୟାପକ ସଚେତନତା ସୃଷ୍ଟି କରିପାରିଛି।