ଦୃଢ଼ ଇଚ୍ଛାଶକ୍ତି, କଠିନ ପରିଶ୍ରମ ଓ ପ୍ରତିଭା ଥିଲେ ଦାରିଦ୍ର୍ୟ ମଧ୍ୟ ସଫଳତାର ପଥରେ ବାଧା ହୋଇପାରେ ନାହିଁ ଏହାର ଏକ ପ୍ରେରଣାଦାୟକ ଉଦାହରଣ ହେଉଛନ୍ତି ରାୟଗଡା ଜିଲ୍ଲା ବିଷମ କଟକ ବ୍ଲକ ଗୋଇଲକଣା ଗ୍ରାମର ଛାତ୍ର ନିତ୍ୟାନନ୍ଦ ହୁଇକା । ଅତ୍ୟନ୍ତ ସାଧାରଣ ଓ ଆର୍ଥିକ ଅନଗ୍ରସର ପରିବାରରୁ ଆସିଥିବା ନିତ୍ୟାନନ୍ଦ ଚଳିତ ବର୍ଷ NEET ପରୀକ୍ଷାରେ ଉଲ୍ଲେଖନୀୟ ସଫଳତା ହାସଲ କରିଛନ୍ତି । ସେ ରାଜ୍ୟ ସ୍ତରରେ ୪୦୭୯ ରାଙ୍କ ହାସଲ କରିଥିବାବେଳେ ନିଜ ବର୍ଗରେ ୧୧୩ ରାଙ୍କ ରଖିଛନ୍ତି । ତାଙ୍କର ଏହି ସଫଳତା ପାଇଁ ସେ ସମ୍ବଲପୁର ବୁର୍ଲାସ୍ଥିତ ବୀର ସୁରେନ୍ଦ୍ର ସାଏ ଚିକିତ୍ସା ବିଜ୍ଞାନ ଓ ଗବେଷଣା ପ୍ରତିଷ୍ଠାନ (VIMSAR)ରେ ଡାକ୍ତରୀ ପାଠ ପଢ଼ିବା ପାଇଁ ମନୋନୀତ ହୋଇଛନ୍ତି ।ନିତ୍ୟାନନ୍ଦ ମୁନିଗୁଡ଼ା ବ୍ଲକ ଝୁମୁରୁଗୁଡ଼ାସ୍ଥିତ ଓଡ଼ିଶା ଆଦର୍ଶ ବିଦ୍ୟାଳୟର ଛାତ୍ର ଥିଲେ । ସେ ଦଶମ ଶ୍ରେଣୀରେ ୮୪ ପ୍ରତିଶତ ଏବଂ ଦ୍ୱାଦଶ ଶ୍ରେଣୀରେ ୮୩.୨ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହୋଇଥିଲେ । ଛୋଟବେଳୁ ଡାକ୍ତର ହେବାର ସ୍ୱପ୍ନ ଦେଖିଥିବା ନିତ୍ୟାନନ୍ଦ ନିଜର ଅଦମ୍ୟ ପରିଶ୍ରମ ଦ୍ୱାରା ଏହି ସ୍ୱପ୍ନର ପ୍ରଥମ ପାହାଚ ଅତିକ୍ରମ କରିଛନ୍ତି । କିନ୍ତୁ ଏହି ସଫଳତାର ପଛରେ ରହିଛି ଏକ ସଂଘର୍ଷମୟ ପରିବାରର କାହାଣୀ । ନିତ୍ୟାନନ୍ଦଙ୍କ ପିତା ମାଦାରାଓ ହୁଇକା ଜଣେ ଦିନମଜୁରିଆ । ପ୍ରତିଦିନ କାମ ମିଳିବ ବୋଲି ନିଶ୍ଚିତତା ନାହିଁ କେବେ କାମ ମିଳେ ତ କେବେ କାମ ନମିଳିବାରୁ ଖାଲି ହାତରେ ଘରକୁ ଫେରିବାକୁ ପଡ଼େ ଦୈନନ୍ଦିନ ଖର୍ଚ୍ଚ ଚଳାଇବା ମଧ୍ୟ କଷ୍ଟକର । ତଥାପି ଅଭାବ ଅନଟନ ମଧ୍ୟରେ ପୁଅର ପାଠପଢ଼ାରେ କେବେ ବାଧା ଆସିବାକୁ ଦେଇନାହାନ୍ତି ବାପା ମାଆ ଙ୍କ ପରିଶ୍ରମର ଫଳ ଆଜି ନିତ୍ୟାନନ୍ଦଙ୍କ NEET ସଫଳତା ରୂପେ ସାମ୍ନାକୁ ଆସିଛି । ନିତ୍ୟାନନ୍ଦଙ୍କ ସଫଳତାରେ ପରିବାର ସହ ଗୋଇଲକଣା ଗ୍ରାମବାସୀ ମଧ୍ୟ ଅତ୍ୟନ୍ତ ଖୁସି ଓ ଗର୍ବିତ । ଜଣେ ଗରିବ ପରିବାରର ପୁଅ ନିଜ ପ୍ରତିଭା ବଳରେ ଡାକ୍ତରୀ ପଢ଼ିବାର ସୁଯୋଗ ପାଇବା ଅଞ୍ଚଳ ପାଇଁ ନିଶ୍ଚିତ ଭାବେ ଗୌରବର ବିଷୟ ।ରାୟଗଡା ଜିଲ୍ଲା ବିଷମ କଟକ ବ୍ଲକର ପରମାନନ୍ଦ କୁଟ୍ରୁକାଙ୍କ ରିପୋର୍ଟ Sakshi tv ଓଡ଼ିଆ
Leave a Reply