ଯୁବାପଦରରେ ଜ୍ୱର ଆତଙ୍କ: ୨ ଶିଶୁଙ୍କ ମୃତ୍ୟୁ ପରେ ଗାଁରେ ସ୍ୱାସ୍ଥ୍ୟ ବିଭାଗର ତତ୍ପରତା

ରାୟଗଡ଼ା ଜିଲ୍ଲା କାଶୀପୁର ବ୍ଲକ କୁଚେଇପଦର ପଞ୍ଚାୟତର ଯୁବାପଦର ଗାଁରେ ଜ୍ୱରକୁ ନେଇ ଆତଙ୍କ। ଗତ ଏକ ସପ୍ତାହ ମଧ୍ୟରେ ୨୦ରୁ ଅଧିକ ଗ୍ରାମବାସୀ ଅସୁସ୍ଥ ହୋଇଥିବାବେଳେ ଜ୍ୱରରେ ୨ ଜଣ ଶିଶୁଙ୍କ ମୃତ୍ୟୁ ପରେ ସ୍ୱାସ୍ଥ୍ୟ ବିଭାଗ ତତ୍ପର ହୋଇଛି।ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରୁ ସ୍ୱତନ୍ତ୍ର ଡାକ୍ତରୀ ଦଳ ଗାଁରେ ପହଞ୍ଚି ଅସୁସ୍ଥଙ୍କ ସ୍ୱାସ୍ଥ୍ୟବସ୍ଥା ଯାଞ୍ଚ କରିଛନ୍ତି। ଗୁରୁତର ଅସୁସ୍ଥଙ୍କୁ ଉଷାପଡ଼ାସ୍ଥିତ ଉତ୍କଳ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ସେଥିରେ ୨ ଜଣ ଶିଶୁ ମଧ୍ୟ ରହିଛନ୍ତି। ଅନ୍ୟପଟେ କାଶୀପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଭ୍ରାମ୍ୟମାଣ ଟିମ୍ ଗାଁରେ ପହଞ୍ଚି ରକ୍ତ ନମୁନା ସଂଗ୍ରହ ସହ ଔଷଧ ବଣ୍ଟନ କରିଛି। ଗ୍ରାମବାସୀଙ୍କୁ ଫୁଟା ପାଣି ପିଇବା ଏବଂ ବାସି ଖାଦ୍ୟ ନଖାଇବାକୁ ପରାମର୍ଶ ଦିଆଯାଇଛି। ତେବେ ଶତାଧିକ ପରିବାର ରହୁଥିବା ଯୁବାପଦରରେ ପିଇବା ପାଣି ସମସ୍ୟା ମଧ୍ୟ ଗୁରୁତର। ୭ଟି ନଳକୂପ ମଧ୍ୟରୁ ୫ଟି ଅଚଳ ଥିବାରୁ ଗ୍ରାମବାସୀ ଝରଣା ପାଣି ବ୍ୟବହାର କରୁଥିବା ଅଭିଯୋଗ ହୋଇଛି। ସେପଟେ କୁଚେଇପଦର ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଖାଲି ଥିବା ଡାକ୍ତର ପଦବୀ ପୂରଣ ପାଇଁ ସରପଞ୍ଚ ବାଙ୍ଗାରୀ ଦିଶାରୀ ସ୍ୱାସ୍ଥ୍ୟ ବିଭାଗର ଦୃଷ୍ଟି ଆକର୍ଷଣ କରିଛନ୍ତି।